Çfarë është këmba e sheshtë?

Këmba e sheshtë ose këmba dystaban, e quajtur në gjuhën mjekësore pes planus, është një gjendje ku harqet natyrore të shputës së këmbës janë të ulura ose mungojnë plotësisht. Normalisht, shputa e këmbës ka një hark që ndihmon në:

  • përthithjen e goditjeve gjatë ecjes,
  • ruajtjen e ekuilibrit,
  • shpërndarjen e peshës së trupit.

Kur ky hark mungon, e gjithë shputa bie në kontakt me tokën, duke ndryshuar mënyrën e ecjes dhe qëndrimit.

 

Kur harku i këmbës mungon:

  • Muskujt e shputës punojnë më shumë
  • Kyçi i këmbës humbet stabilitetin
  • Gjunjët dhe kofshët marrin ngarkesë të shtuar ngaqë endra e ekuilibrit ndryshon

Kjo çon në ecje të paqëndrueshme (dystabane) me këmbët që rrotullohen nga brenda, pacienti lodhet më shpejt sepse sjell dhimbje zinxhir (këmbë–gju–kofshë–shpinë).

Ankesat më të shpeshta

  • Dhimbje në shputë, pas ecjes së gjatë
  • Dhimbje në thembër ose kyçin e këmbës
  • Lodhje të shpejtë gjatë qëndrimit në këmbë
  • Ndjenjë pasigurie ose “lëkundjeje” gjatë ecjes
  • Dhimbje në gju, kofshë ose shpinë
  • Konsumim jo i barabartë i këpucëve

⚠️ Tek disa persona simptomat shfaqen vetëm pas vitesh.

Shkaqet kryesore

Këmba e sheshtë mund të shkaktohet nga:

  • Faktorë gjenetikë
  • Dobësi e muskujve dhe ligamenteve
  • Mbipeshë ose obezitet
  • Qëndrim i gjatë në këmbë me këpucë të papërshtatshme
  • Sëmundje reumatologjike ose neurologjike

Si vendoset diagnoza?

Diagnoza bëhet nga ortopedi dhe përfshin:

  • Ekzaminim të shputës së këmbës dhe vëzhgim të qëndrimit dhe ecjes
  • Testin e qëndrimit në majë të gishtave
  • Analizë të ecjes (gait analysis)
  • Radiografi spevifike e bërë në peshë

Trajtimi – çfarë duhet të dijë pacienti

Trajtimi konservativ (linja e parë)

Në shumicën e rasteve nuk nevojitet operacion.

Përdoren:

  • Shtresa ortopedike të personalizuara
  • Këpucë me mbështetje të mirë të harkut
  • Fizioterapi për forcimin e muskujve dhe ushtrime të rekomanduara nga fizioterapisti
  • Rënie në peshe, kur është e nevojshme

Trajtimi kirurgjikal, kur duhet bërë?

Operacioni rekomandohet vetëm kur:

  • Dhimbja është e vazhdueshme dhe e fortë
  • Trajtimi konservativ nuk jep rezultat
  • Ka deformim të rëndë strukturor

Ky vendim merret vetëm nga mjeku specialist.

Çfarë ndodh nëse nuk trajtohet?

Pa trajtim, këmba e sheshtë mund të çojë në:

  • Dhimbje kronike
  • Përkeqësim të ecjes dystabane
  • Probleme në gjunjë dhe shpinë
  • Ulje të cilësisë së jetës

Këshilla praktike për pacientët

✔ Vish këpucë të përshtatshme
✔ Përdor shtresa ortopedike
✔ Kryej ushtrime rregullisht
✔ Mos injoro dhimbjen
✔ Konsulto specialistin herët